Gwamnan Jihar Zamfara, Dauda Lawal, ya sanya hannu kan wasu sabbin dokokin zartarwa da nufin inganta tsarin ilimi a jihar, tare da ƙaddamar da rabon daftarin manhajar karatu ta ƙasa ga makarantun gwamnati.
Sabbin dokokin sun shafi inganta tafiyar da makarantu, kare makarantu, lafiyar ɗalibai, tsaro, ciyar da ɗalibai, da kuma tabbatar da amintaccen sufuri zuwa makarantu.
Gwamna Lawal ya bayyana cewa ilimi shi ne ginshiƙin rage talauci, samar da zaman lafiya, ƙarfafa tsaro da bunƙasa tattalin arziki.
Ya ce gwamnatin Zamfara za ta ci gaba da saka hannun jari a fannin ilimi domin tabbatar da kyakkyawar makoma ga ɗaliban jihar.
A nasa jawabin, Kwamishinan Ilimi, Kimiyya da Fasaha na Jihar Zamfara, Abdulmalik Abubakar Gajam, ya ce nasarar waɗannan sauye-sauye za ta dogara ne da haɗin gwiwar gwamnati, malamai, iyaye, al’umma da sauran masu ruwa da tsaki.
