Shugaban ƙasar Masar, Abdel Fattah Al-Sisi, ya tabbatar da cewa wa’adinsa na shugabancin ƙasar zai ƙare a shekarar 2030, yana mai cewa ba zai nemi sauya kundin tsarin mulkin ƙasar domin tsawaita lokacin mulkinsa ba.
Al-Sisi ya bayyana hakan ne a ranar Asabar yayin bikin yaye ɗalibai a Kwalejin Sojojin Masar da ke sabon babban birnin gudanarwa na ƙasar, kamar yadda jaridar gwamnatin ƙasar, Al-Ahram, ta ruwaito. Ya ce batun ƙarshen wa’adinsa a 2030 ya riga ya kammala, kuma ba za a taɓa kundin tsarin mulkin ƙasar ba.
An sake zaɓen Al-Sisi a shekarar 2023 domin wa’adin mulki na shekaru shida, bayan ya samu kusan kashi 90 cikin 100 na ƙuri’un da aka kaɗa. Ya kuma jaddada muhimmancin kiyaye kundin tsarin mulki da dimokuraɗiyya, tare da bayyana cewa rundunar sojin ƙasar na da alhakin kare waɗannan ginshiƙai.
Shugaban ya ce ba zai bar Masar ba har sai an samar da sabbin shugabanni da za su iya tafiyar da harkokin ƙasar, yana mai cewa ana horas da matasa domin su karɓi ragamar jagoranci a nan gaba.
A wani ɓangare na jawabin nasa, Al-Sisi ya bayyana cewa Masar a shirye take ta ɗauki matakan da suka dace domin kare tsaro da ikon mulkin Saudiyya idan ƙasar ta buƙaci hakan. Ya ce zai nemi majalisar dokokin Masar ta gudanar da zaman gaggawa domin ba da izinin ɗaukar matakan da suka dace, idan bukatar hakan ta taso.
