Kocin Real Madrid, Jose Mourinho, ya ce da shi ne Vinicius Junior, da ya nemi barin ƙungiyar a kasuwar musayar ’yan wasa ta bazarar bana saboda cin zarafin da yake fuskanta.
Mourinho ya bayyana hakan ne yayin da yake kare ɗan wasan ɗan Brazil mai shekara 26, wanda aka dakatar da shi daga wasanni huɗu bayan an kore shi a wasan da Real Madrid ta buga da Villarreal bisa zargin jan gashin wani ɗan wasa.
Hukuncin zai sa Vinicius ya rasa wasan El Clasico da za a yi tsakanin Real Madrid da Barcelona ranar 25 ga Oktoba. Tun bayan komawarsa Madrid a shekarar 2018, ɗan wasan ya sha fuskantar cin zarafi daga magoya bayan abokan hamayya, ciki har da na wariyar launin fata.
Mourinho ya bayyana Vinicius a matsayin ɗan wasa na musamman, yana yabawa yadda yake ci gaba da murmushi duk da matsalolin da yake fuskanta. Ya ce ƙaunar da yake yi wa Real Madrid ce ta sa ya sabunta kwantiraginsa har zuwa shekarar 2032.
Mourinho ya kuma ce yana farin ciki da cewa an dakatar da Vinicius na wasanni huɗu kawai, domin yana zargin cewa za a iya ƙara masa hukuncin. A halin yanzu, Real Madrid na shirin fuskantar Sevilla, yayin da take ƙoƙarin rage tazarar maki tsakaninta da Barcelona a saman teburin La Liga.
