Hukumar ilimin bai daya ta Kano (SUBEB) ta sanar da shirin daukar karin malamai 4,000 domin inganta koyar da Lissafi da Turanci a makarantun firamare da na sakandaren farko a fadin jihar.
Shugaban hukumar, Yusuf Kabir, ya bayyana wannan shiri a yayin taron duba sakamakon bincike koyo na 2025 da aka gudanar a Kano, tare da goyon bayan shirin PLANE na gwamnatin Birtaniya.
Ya ce duk da cewa jihar ta dauki malamai 4,343 a baya-bayan nan, akwai kananan hukumomi da dama da har yanzu ke fama da karancin malamai.
Za a gwada malamai kafin daukar su aiki
Kabir, wanda Sakatariyar SUBEB, Hajiya Amina Umar, ta wakilta, ya ce hukumar na kammala shirye-shirye a cibiyoyi bakwai na jarabawar kwamfuta da ke Wudil, Bichi da wasu wurare, inda za a gudanar da gwajin cancantar masu nema.
Ya bayyana cewa a wasu makarantu, malami guda yana kula da dalibai har 132, al’amarin da yake rage ingancin koyarwa.
A cewarsa, hukumar na kokarin rage cunkoson aji ta hanyar tabbatar da tsarin malami daya ga dalibai 60, domin inganta ilimin yara a duk fadin jihar.
