Gwamnatin Tarayyar Najeriya ta bai wa Iconic Open University cikakken lasisin aiki na dindindin, ta hannun Hukumar Kula da Jami’o’i ta Ƙasa (NUC).
An bayar da lasisin ne a yau Talata, 22 ga Satumba, 2026, a Abuja, lamarin da ya mayar da Iconic Open University cikakkiyar jami’a mai zaman kanta da aka amince da ita a Najeriya.
Wannan mataki ya zo ne bayan jami’ar ta kammala wa’adin lasisin wucin gadi da ta samu a shekarar 2023.
Hukumar NUC ta gudanar da cikakken bincike da tantance jami’ar a watan Mayu 2026, inda aka duba tsarin karatu, shirye-shiryen koyarwa, ma’aikata, shugabanci, kayayyakin more rayuwa da tsarin tabbatar da ingancin ilimi.
Samun cikakken lasisin ya nuna cewa jami’ar ta cika sharuddan da hukumomin da suka dace suka gindaya, tare da nuna ci gabanta wajen samar da ingantaccen ilimi da faɗaɗa damar samun ilimin jami’a a Najeriya.
An bayar da lasisin ne tare da haɗin gwiwar Ma’aikatar Ilimi ta Tarayya da NUC, ƙarƙashin jagorancin Ministan Ilimi, Dr. Maruf Tunji Alausa, da Babban Sakataren NUC, Prof. Abdullahi Yusufu Ribadu.
Wannan nasara ta zo ne shekaru uku kacal bayan samun lasisin farko a shekarar 2023, inda jami’ar ta ce hakan ya ƙara tabbatar da ƙudurinta na bin ƙa’idojin gwamnati, inganta ilimi da samar da damar karatu ga ɗalibai.
