Ƙungiyar Dillalan Man Fetur ta Najeriya (IPMAN) ta ce masu gidajen mai a Abuja za su fara rage farashin fetur a gidajen mai cikin ’yan kwanaki masu zuwa.
Shugaban Sashen Hulɗa da Jama’a na IPMAN na ƙasa, Chinedu Ukadike, ne ya bayyana hakan a ranar Alhamis yayin wata tattaunawa da Kamfanin Dillancin Labaran Najeriya (NAN) a Abuja.
Ukadike ya ce ana sa ran sauyin farashin ne sakamakon sauye-sauyen da ake samu a farashin man fetur a kasuwar cikin gida.
A cewarsa, sauyin da ake samu a kasuwa na bai wa dillalan man damar yin gyara kan farashin da suke sayar da fetur ga masu amfani.
Ya ce hakan na iya haifar da raguwar farashin fetur a gidajen mai, musamman yayin da masu sayar da man ke samun sauƙin farashi daga masu samar musu da shi.
Sai dai ya kamata masu amfani da fetur su lura da cewa farashin na iya bambanta daga gidan mai zuwa wani, gwargwadon farashin da dillalan suka saya da kuma sauran kuɗaɗen da ke tattare da jigilar man zuwa wuraren sayarwa.
