Ɗan Majalisar Dattawan Najeriya, Sanata Ali Ndume, ya yi kira ga jam’iyyun adawa da su mayar da hankali kan ayyukan raya ƙasa da Shugaba Bola Ahmed Tinubu ya gudanar, maimakon ci gaba da muhawara kan takardun karatunsa yayin da ake ƙara kusantar zaɓen 2027.
Ndume, wanda yana daga cikin manyan ’yan jam’iyyar APC, ya bayyana hakan ne a wata sanarwa da ya fitar a Abuja ranar Litinin.
Sanatan ya ce muhawarar da ake yi kan takardun karatun Shugaba Tinubu na kawar da hankalin ’yan Najeriya daga muhimman batutuwan da ya kamata su zama ginshiƙin yakin neman zaɓen shugaban ƙasa na 2027.
A cewarsa, ya kamata ’yan adawa su mayar da hankali wajen tantance ayyukan gwamnatin Tinubu, manufofinta da tasirinsu ga rayuwar ’yan Najeriya, maimakon ci gaba da ɗaukar batun takardun karatu a matsayin babban batu na siyasa.
Ndume ya ce zaɓen 2027 ya kamata ya kasance lokaci ne da ’yan siyasa za su gabatar wa al’umma da manufofi da shirye-shiryen da za su magance matsalolin da ƙasar ke fuskanta.
Ya ƙara da cewa ’yan Najeriya na buƙatar sanin abin da ’yan takara da jam’iyyun siyasa za su iya yi wajen inganta tattalin arziki, tsaro, samar da ayyukan yi da bunƙasa ababen more rayuwa.
Sanatan ya buƙaci jam’iyyun adawa da su yi amfani da damar da suke da ita wajen yin suka bisa manufofi da ayyukan gwamnati, tare da gabatar da wasu hanyoyin da suka fi dacewa, maimakon mayar da hankali kan batutuwan da ba su shafi rayuwar talakawa kai tsaye ba.
Ya ce irin wannan muhawara mai ma’ana za ta bai wa ’yan Najeriya damar tantance irin shugabancin da ya fi dacewa da su a zaɓen 2027.
Ndume ya jaddada cewa ya kamata a yi wa kowace gwamnati alƙalanci bisa ayyukan da ta gudanar da kuma yadda ta sauya rayuwar al’umma, yana mai kira ga ’yan siyasa da su mayar da yakin neman zaɓe kan abubuwan da suka shafi ci gaban ƙasa.
