Omoyele Sowore, ɗan takarar shugabancin ƙasa na jam’iyyar AAC, ya isa Babbar Kotun Tarayya da ke Abuja a ranar Litinin domin shari’arsa, bayan da kotu ta bayar da umarnin a kama shi.
Sowore, wanda kuma shi ne mai wallafa jaridar Sahara Reporters, ya isa kotun tare da wasu mambobin ƙungiyarsa, inda suke rike da allunan zanga-zanga.
Kamfanin Dillancin Labarai na Najeriya, NAN ya ruwaito cewa Mai Shari’a Mohammed Umar ya soke belin da aka taɓa ba Sowore a ranar 16 ga Yuni, bayan ya gaza halartar zaman kotu na shari’arsa.
Mai shari’ar, a cikin hukuncinsa kan buƙatar da lauyan Hukumar Tsaro ta DSS, Akinkolu Kehinde, SAN, ya gabatar a baki, ya kuma bayar da umarnin kama Sowore.
DSS na tuhumar Sowore ne kan zargin yin kalamai na ƙarya game da Shugaban Ƙasa Bola Tinubu, inda ya kira shi “mai laifi” a sakonnin da ya wallafa a shafukan sa na X da Facebook.
