Gwamnatin Tarayya ta bayyana cewa za ta kwashe sama da ’yan Najeriya 742 da ke ƙasar Afirka ta Kudu kafin ranar 30 ga Yuni, sakamakon hare-haren kyamar baƙi da ke ci gaba da ƙaruwa a ƙasar.
Ministar Harkokin Waje, Ambasada Bianca Odumegwu-Ojukwu, ta ce gwamnatin Shugaba Bola Tinubu ta himmatu wajen tabbatar da cewa babu wani ɗan Najeriya da ya nemi komawa gida da za a bari a baya.
Ta bayyana cewa an riga an kwaso rukuni na farko da ya ƙunshi mutum 258, yayin da kusan mutum 1,000 suka yi rajistar komawa Najeriya. Ana sa ran za a kwaso sauran fiye da mutum 742 cikin kwanaki masu zuwa kafin wa’adin ranar 30 ga Yuni.
Ministar ta kuma nuna damuwa kan hare-haren da ake kai wa ’yan Najeriya da sauran baƙin haure a Afirka ta Kudu, tana mai cewa gwamnati na ci gaba da tattaunawa da hukumomin ƙasar domin kare rayuka da haƙƙin ’yan Najeriya.
