Shugaban Hukumar Kwallon Ƙafa ta Duniya (FIFA), Gianni Infantino, ya taya tawagar ƙwallon ƙafar mata ta Najeriya, Flamingos, murnar lashe gasar cin kofin duniya ta mata ’yan ƙasa da shekaru 17 ta shekarar 2026.
Infantino ya taya tawagar murnar ne bayan ta doke takwararta ta Japan da ci 2-1 a wasan ƙarshe da aka gudanar ranar Asabar, 7 ga Nuwamba, a birnin Rabat na ƙasar Morocco.
A cikin saƙon taya murnar, shugaban na FIFA ya bayyana nasarar a matsayin abin tarihi, yana mai cewa Najeriya ta zama ƙasar Afirka ta farko da ta lashe kofin duniya na mata ’yan ƙasa da shekaru 17.
Ya ce nasarar da Flamingos ta samu ta cancanci yabo, tare da taya Japan murnar zama ta biyu a gasar, yayin da Koriya ta Arewa ta zo ta uku.
Wannan nasara ta zama tarihi ga Najeriya da nahiyar Afirka, domin ita ce karon farko da wata tawagar mata daga Afirka ta lashe gasar cin kofin duniya ta FIFA a kowane mataki.
