Ɗan takarar shugaban ƙasa na jam’iyyar AAC, Omoyele Sowore, ya ce halin da ake ciki na talauci, yunwa, rashin aikin yi da rashin tsaro ya hana miliyoyin ’yan Najeriya samun damar murnar cikar ƙasar shekaru 66 da samun ’yancin kai.
Sowore ya bayyana hakan ne a wani saƙo da ya wallafa a shafinsa na X ranar Alhamis, 1 ga Oktoba, 2026, yayin da Najeriya ke bikin ranar samun ’yancin kai.
Ya ce samun ’yancin kai na gaskiya bai kamata ya tsaya kan samun ’yancin mulkin mallaka kawai ba, yana mai cewa ya kamata ya haɗa da samun ’yanci, mutunci, adalci da daidaito ga kowane ɗan ƙasa.
Sowore ya kuma yi nuni da matsalolin da suka shafi ilimi, kiwon lafiya, wutar lantarki da sauran muhimman abubuwan more rayuwa, yana mai cewa waɗannan ƙalubale na ci gaba da shafar rayuwar ’yan Najeriya.
A cewarsa, ba daidai ba ne a ɗora wa ’yan ƙasa alhakin matsalolin da ƙasar ke fuskanta, domin ya bayyana ’yan Najeriya a matsayin mutane masu aiki tuƙuru, ƙirƙira da juriya.
Ya ce bikin cikar Najeriya shekaru 66 da samun ’yancin kai ya kamata ya zama wata dama ta yin nazari kan irin ci gaban da ƙasar ta samu da kuma ƙalubalen da har yanzu take fuskanta.
