Kwamitin kula da tattara kuɗaɗen shiga na Jihar Edo ya kama wasu mutum biyu, Tony Amayo da Thompson Okun, bisa zargin karɓar kuɗaɗen haraji ba bisa ƙa’ida ba bayan korafe-korafen da ’yan kasuwa da kwastomomi suka shigar kan zargin karɓar kuɗi ta hanyar tilas.
An kama mutanen ne a Kasuwar Kayayyakin Gyaran Motoci ta Uwelu da ke Ƙaramar Hukumar Egor, bayan ’yan kasuwa sun koka cewa wasu mutane na karɓar kuɗaɗen haraji ba tare da izini ba daga masu gudanar da halalcin kasuwancinsu.
Kwamandan kwamitin, Johnbull Rufus, ya ce an kama waɗanda ake zargin ne yayin da suke karɓar kuɗi da sunan tattara haraji tare da ba da tikitin biyan kuɗi, duk da umarnin gwamnatin jihar da ya haramta duk wani nau’in karɓar haraji ko bayar da tikiti ba tare da izini ba.
Ya ce bayan samun rahotannin daga ‘yan kasuwa da kwastomomi, jami’an kwamitin sun ɗauki matakin gaggawa tare da cafke waɗanda ake zargin.
Rufus ya jaddada aniyar gwamnatin Edo na kare mazauna jihar da ‘yan kasuwa daga duk wani nau’in karɓar kuɗi ta hanyar danniya, tare da gargadin duk masu aikata irin wannan haramtacciyar ɗabi’a da su daina ko kuma su fuskanci hukuncin doka.
