Fadar Shugaban Ƙasa ta ce ƙoƙarin tsohon mataimakin shugaban ƙasa, Atiku Abubakar, na sake tayar da batun kwacen kadarorin Shugaba Bola Ahmed Tinubu a Amurka ba zai amfane shi a siyasa ba.
Mai ba shugaban ƙasa shawara kan yaɗa labarai da dabaru, Bayo Onanuga, ya ce sake dawo da zarge-zargen da aka yi amfani da su a lokacin yaƙin neman zaɓen 2023 ba zai ƙara wa Atiku wata dama a zaɓen 2027 ba.
Onanuga ya kuma yi zargin cewa Atiku ya kashe Dala miliyan 1.2 wajen ɗaukar hayar wani kamfani a Amurka domin yaɗa korafe-korafe kan Shugaba Tinubu.
A cewarsa, da ace Atiku ɗan ƙasar China ne, da tuni an gurfanar da shi a gaban doka bisa abin da ya kira laifuffukan da ya aikata.
Ya kuma soki Atiku kan ci gaba da neman goyon bayan ƙasashen waje kan batutuwan siyasar cikin gida.
