Wani tsohon hoto da ke nuna Lionel Messi yana wanka wa jariri Lamine Yamal ya sake ɗaukar hankalin duniya, bayan hukumomin UNICEF sun tabbatar da cewa hoton na gaske ne, ba kirkirar fasahar AI ba. An ɗauki hoton ne a shekarar 2007 yayin wani shirin tara kuɗaɗen tallafawa yara da UNICEF da gidauniyar Barcelona suka shirya.
A lokacin da aka ɗauki hoton, Messi yana da shekara 20 a duniya kuma lokacin ya fara haskakawa a Barcelona, yayin da Yamal ke da kusan watanni shida kacal da haihuwa. Iyayen Yamal sun samu damar halartar shirin ne bayan sun yi nasara a wata kuri’ar neman mahalarta da aka shirya domin wannan aikin jin ƙai.
Hoton ya fara yaduwa sosai tun a shekarar 2024, amma yanzu ya sake zama abin magana yayin da Argentina da Spain ke shirin fafatawa a wasan ƙarshe na gasar Kofin Duniya ta FIFA 2026. Wannan ne karo na farko da Messi da Yamal za su kara da juna a babban matakin ƙwallon ƙafa.
UNICEF ta bayyana cewa abin farin ciki ne ganin waɗannan fitattun ’yan wasa biyu da suka haɗu a matsayin jariri da matashi shekaru 19 da suka gabata, yanzu kuma suna daga cikin jakadun UNICEF masu fafutukar kare haƙƙin yara a duniya. Hukumar ta ce wannan labari yana nuna yadda mafarki da baiwa za su iya canza rayuwa.
Yayin da duniya ke jiran wasan ƙarshe tsakanin Spain da Argentina, mutane da dama na kallon wannan hoto a matsayin wata alama ta haɗuwar tsohon ƙarni da sabon ƙarni a duniyar ƙwallon ƙafa, inda gwarzon da ya kafa tarihi ke fuskantar ɗaya daga cikin matasan da ake ganin zai zama babban tauraro a nan gaba.
