Adadin mutanen da suka rasa rayukansu sakamakon mummunar girgizar ƙasar da ta afku a Venezuela ya ƙaru zuwa 5,069, kamar yadda jami’an ƙasar suka tabbatar.
Tagwayen girgizar ƙasar masu ƙarfin maki 7.2 da 7.5 sun afku cikin tazarar minti ɗaya a ranar 24 ga Yuni, inda suka yi mummunar barna musamman a jihar La Guaira da ke bakin teku, arewacin birnin Caracas.
A cewar shugaban Majalisar Dokokin Venezuela, Jorge Rodriguez, mutane 16,740 ne suka jikkata a bala’in, kuma mafi yawan waɗanda suka samu raunuka an sallame su daga asibiti bayan sun samu kulawa.
Haka kuma, sama da mutane 20,000 sun rasa matsugunansu, inda suke zaune a sansanonin wucin gadi da ke fuskantar ƙarancin ruwan sha da matsalolin tsafta.
A wani mataki na tallafa wa ƙasar, Asusun Ba da Lamuni na Duniya (IMF) ya amince da bayar da dala miliyan 346 domin tallafawa ayyukan sake gina yankunan da girgizar ƙasar ta shafa.
