An tsare Adeniyi Adeyemi, wanda ke ikirarin shi ne Darakta Janar na Presidential Intervention Promotion Council (PFIPC), a hedikwatar Intelligence Response Team (IRT) da ke tsohon hedikwatar SARS a Guzape, Abuja, yayin da ake ci gaba da bincike kan zargin gudanar da wata hukuma da gwamnatin tarayya ta bayyana a matsayin ta bogi.
Rahotanni sun ce jami’an IRT sun kama Adeyemi ne a Jihar Osun kafin su kai shi Ibadan, daga nan kuma aka tafi da shi a jirgin sama zuwa Abuja. An ce kamen nasa ya biyo bayan sammacin kotu da Alkalin Babbar Kotun Tarayya, Mai Shari’a Mohammed Umar, ya bayar saboda gazawarsa wajen gurfana a gaban kotu.
Majiyoyi sun bayyana cewa ana yi wa Adeyemi tambayoyi kan zargin gudanar da wata hukuma ba bisa ƙa’ida ba tare da wasu ayyuka da hukumomin tsaro ke bincike a kai. Rundunar ’yan sanda ba ta fitar da cikakken bayani kan binciken ba, sai dai ta tabbatar da cewa ana ci gaba da gudanar da bincike.
A wani ci gaba, Shugaban Ma’aikatan Fadar Shugaban Ƙasa, Femi Gbajabiamila, ya shigar da ƙarar neman diyyar Naira biliyan 15 a kan Adeyemi bisa zargin ɓata masa suna. Ya kuma buƙaci kotu ta tilasta masa janye kalaman da ya yi tare da wallafa ba da haƙuri a manyan jaridu da kafafen sada zumunta.
Lamarin na da alaƙa da binciken da gwamnatin tarayya ta umarci a gudanar kan PFIPC, wadda aka ce ba ta cikin hukumomin gwamnatin tarayya da aka amince da su, duk da zargin cewa tana gudanar da ayyukanta a matsayin hukuma ta gwamnati.
