Mataimakin Shugaban Ƙasa, Sanata Kashim Shettima, ya ƙaddamar da Asusun Zuba Jari na Bunƙasa Noma a Yankin Neja Delta (Niger Delta Agricultural Development Investment Fund – NDADIF), wani shiri da ke da nufin bunƙasa harkar noma, samar da abinci da kuma ƙarfafa tattalin arzikin yankin.
Shettima ya bayyana cewa shirin wani muhimmin mataki ne na gwamnatin Shugaba Bola Ahmed Tinubu wajen sauya fasalin tattalin arzikin Neja Delta daga dogaro da albarkatun mai zuwa inganta noma da sauran fannoni masu ɗorewa.
Ya ce asusun zai samar da tallafin kuɗi ga manoma, ƙananan da matsakaitan kamfanoni, da masu zuba jari a harkar noma, tare da ƙarfafa amfani da fasahohin zamani domin haɓaka samar da abinci da ƙirƙirar ayyukan yi.
Mataimakin shugaban ƙasar ya jaddada cewa bunƙasa noma zai taimaka wajen rage talauci, inganta rayuwar al’umma da kuma tabbatar da wadatar abinci a yankin da ma Najeriya baki ɗaya.
Shi ma Ministan Raya Yankin Neja Delta, Abubakar Momoh, ya ce shirin zai ƙara jawo masu zuba jari zuwa yankin, tare da bai wa matasa da mata damar samun ayyukan yi da inganta rayuwarsu.
Jami’an gwamnati sun bayyana cewa za a aiwatar da shirin ne tare da haɗin gwiwar hukumomin gwamnati, kamfanoni masu zaman kansu da kuma abokan hulɗar ci gaba domin tabbatar da nasarar sa da dorewar amfanin da zai haifar ga al’ummar yankin.
