Gwamnatin Nasarawa ta bayyana cewa sama da mutum 10,000 ne suka nemi guraben aikin koyarwa 1,000 a makarantun firamare, bayan gwamnatin jihar ta amince da ɗaukar sabbin malamai ƙarƙashin wani shiri na musamman domin ƙarfafa ilimi a yankunan karkara.
Babban Mataimaki na Musamman ga Gwamna kan Harkokin Jama’a, Peter Ahemba, ne ya bayyana hakan yayin taron manema labarai na wata biyu da aka gudanar a Sakatariyar Ƙungiyar Ƴan Jarida ta Najeriya (NUJ) reshen jihar da ke Lafia.
A cewarsa, ɗaukar malaman na ƙarƙashin Nasarawa Universal Basic Education Board ne, kuma an tsara shirin ne domin rage matsalar ƙarancin malamai da ake fuskanta a makarantun firamare da ke yankunan karkara.
Ya ƙara da cewa duk malamai 1,000 da za a ɗauka za a tura su kai tsaye zuwa makarantun karkara domin inganta koyarwa da kuma bunƙasa ilimin yara a waɗannan yankuna.
Gwamnatin jihar ta ce wannan shiri na daga cikin matakan da take ɗauka wajen ƙarfafa fannin ilimi da tabbatar da cewa ɗalibai a yankunan karkara sun samu isassun malamai masu ƙwarewa.
