Rundunar ‘Yansandan Jihar Zamfara ta ceto mutane bakwai da aka yi garkuwa da su bayan wani harin ‘yan bindiga na cikin dare a karamar hukumar Gusau.
Lamarin dai ya faru da misalin karfe 11 na dare a ranar 25 ga Maris, lokacin da ‘yan bindiga dauke da muggan makamai suka kai hari gidan Muhammad Lawal da ke Nasarawa, Gundumar Damba.
Maharan sun sace matarsa tare da ‘ya’yansa shida a cikin wani mummunan hari mai ban tsoro.
A halin yanzu, an ceto dukkan mutanen bakwai ba tare da wani rauni ba, kuma an mayar da su lafiya zuwa ga iyalansu.
Da yake tabbatar da faruwar lamarin, jami’in hulda da jama’a na rundunar ‘yansanda, Yazid Abubakar, ya ce rundunar na ci gaba da jajircewa wajen kare rayuka da dukiyoyin al’umma a fadin jihar.
