A rana irin ta yau, 7 ga watan Oktoba, 2006, aka kashe shahararriyar ’yar jaridar bincike ta ƙasar Rasha, Anna Politkovskaya, a birnin Moscow.
Politkovskaya ta kasance marubuciya kuma ’yar jaridar bincike da ke aiki da jaridar Novaya Gazeta, ɗaya daga cikin kafafen yaɗa labarai masu zaman kansu da suka yi fice a Rasha a wancan lokaci.
Ta shahara wajen rubuce-rubucenta kan Yaƙin Chechnya na Biyu, inda ta fallasa zarge-zargen cin zarafin bil’adama da sojojin Rasha ke aikatawa. Haka kuma, ta kasance ɗaya daga cikin fitattun masu sukar manufofin Shugaba Vladimir Putin.
A ranar da aka kashe ta, Politkovskaya ta shiga cikin lif na rukunin gidajen da take zaune a Moscow, inda wani mutum ya harbe ta har sau huɗu, ciki har da harbi a kai, wanda ya yi sanadin mutuwarta.
Kafin mutuwarta, Politkovskaya ta sha fuskantar barazana da tsangwama saboda irin rahotannin da take wallafawa. A wani lokaci an tsare ta a Chechnya, sannan a shekarar 2004 ta tsallake rijiya da baya bayan wani yunƙurin sanya mata guba.
Kisan nata ya jawo Allah-wadai daga ƙungiyoyin kare ’yancin ɗan Adam da na ’yan jarida a duniya. Bayan shekaru ana bincike, a shekarar 2014, an yanke wa mutane biyar hukuncin ɗaurin rai da rai ko kuma dogon zaman gidan yari bisa hannu a kisan nata.
Sai dai har yanzu ba a gano wanda ya bayar da umarnin kashe ta ba. Wannan ya sa kisan Anna Politkovskaya ya ci gaba da kasancewa ɗaya daga cikin fitattun misalan haɗarin da ’yan jaridar bincike da masu sukar gwamnati ke fuskanta a Rasha.
Mutuwarta ta bar babban gibi a duniyar aikin jarida, musamman wajen kare ’yancin faɗar albarkacin baki da fallasa take hakkin bil’adama.
