Ƙungiyar kare haƙƙin bil’adama ta Amnesty International ta ce ’yan bindiga sun kashe manoma 24 tare da jikkata wasu da dama a wani hari da suka kai yankin Sauna Ruwan Gora da ke ƙaramar hukumar Talata Mafara a jihar Zamfara.
A cewar ƙungiyar, maharan sun buɗe wa manoman da ke aiki a gonakinsu wuta, yayin da wasu suka tsere da raunuka masu tsanani.
Ta kuma bayyana cewa har yanzu akwai wasu manoman da ba a san inda suke ba bayan harin.
Amnesty International ta ce hare-haren da ake ci gaba da samu na nuna buƙatar ƙara inganta tsaro, tare da kira ga hukumomi su kare rayukan al’umma da kuma gurfanar da waɗanda ke da hannu a irin waɗannan hare-hare a gaban kotu.
