Shugaban Majalisar Dattawa, Godswill Akpabio, mataimakinsa Barau Jibrin, da wasu gwamnoni bakwai na jihohi na daga cikin manyan jiga-jigan jam’iyyar APC da za su fafata domin samun tikitin takarar kujerun sanata a zaɓen fidda gwani da ake gudanarwa yau.
Rahotanni sun nuna cewa zaɓen fidda gwanin ya jawo gasa mai zafi a jihohi da dama, inda manyan shugabannin siyasa ke neman komawa majalisar dattawa bayan kammala wa’adinsu ko kuma domin ci gaba da riƙe kujerunsu.
Daga cikin fitattun ‘yan takarar akwai gwamnoni bakwai da ke shirin kammala wa’adinsu, waɗanda ke neman sauya sheƙa daga kujerar gwamnoni zuwa majalisar dattawa. Haka kuma akwai sanatoci masu ci da kuma wasu sababbin ‘yan takara da ke neman ƙwace tikitin, lamarin da ya sa ake sa ran fafatawar za ta kasance mai zafi sosai.
Masana siyasa na ganin wannan fafatawa za ta taka muhimmiyar rawa wajen tsara taswirar siyasar Najeriya gabanin babban zaɓen 2027, musamman duba da yadda manyan jiga-jigan APC ke neman tabbatar da tasirinsu a cikin jam’iyyar da kuma matakin ƙasa baki ɗaya.
Ana sa ran sakamakon zaɓen fidda gwanin zai bayyana waɗanda za su wakilci jam’iyyar APC a kujerun sanatoci a faɗin ƙasar domin tunkarar babban zaɓen shekarar 2027.
