Ministan Tsaro na Najeriya, Christopher Musa ya gayyaci dukkan Shugabannin Rundunonin Soji zuwa ofishinsa domin wani muhimmin taro kan hare-haren da aka kai kwanan nan a sansanonin soji daban-daban a yankin Arewa maso Gabas.
Waɗanda suka halarci taron a Hedikwatar Ma’aikatar Tsaro da ke Abuja a ranar Laraba sun haɗa da Shugaban Hafsoshin Tsaro, Olufemi Oluyede, da Shugaban Rundunar Sojin Ƙasa, Waidi Shaibu.
Sauran sun haɗa da Shugaban Rundunar Sojin Sama, Sunday Aneke; Shugaban Rundunar Sojin Ruwa, Idi Abass; da wakilai daga Hukumar Leƙen Asiri ta Ƙasa da sauransu.
A baya bayan nan dai yan ta’adda sun kashe aƙalla jami’an soja uku masu mukamin Laftanal-Kanal a Jihar Borno, sannan sojoji da dama ma sun rasa rayukansu, yayin da daruruwan fararen-hula da aka sace har yanzu ke hannun masu garkuwa da su.
Da yake magana kafin a fara taron na sirri, Ministan Tsaron ya ce sun amince su sake duba dabarun yaƙi da ‘yanta’adda.
“Mun san cewa mun yi asarar wasu, amma asarar ta fi yawa a ɓangaren ‘yan ta’addan,” in ji Ministan Tsaron.
