Dukkan mutane 32 da ke cikin wani jirgin sojin saman Najeriya sun mutu bayan jirgin ya yi hatsari a jihar Ondo.
Jirgin ATR-42 ya yi hatsarin ne da safiyar Litinin, bayan ya taso daga Benin zuwa Lagos. Mutanen da ke cikin jirgin sun hada da fasinjoji 25 da ma’aikatan jirgin bakwai.
Shugaban Najeriya, Bola Ahmed Tinubu, ya mika sakon ta’aziyya ga iyalan wadanda suka rasu, tare da rundunar sojin saman Najeriya.
Tinubu ya ce hatsarin babban rashi ne ga sojoji da kuma kasa baki daya, inda ya yabawa jami’an da suka fara aikin ceto da hukumomin jihar Ondo kan martanin gaggawa.
Ya kuma bayar da umarnin gudanar da bincike cikin gaggawa domin gano musabbabin hatsarin da kuma daukar matakan hana sake faruwar irin haka.
Ya zuwa yanzu, hukumomi ba su bayyana sunayen wadanda suka rasu ko kuma ko akwai wadanda suka jikkata ba.
