Mataimakin Shugaban Majalisar Dattawa, Sanata Barau I Jibrin, ya ce gangamin “APC SAK” da yake jagoranta na samun ƙarin karɓuwa a ƙananan hukumomi 13 na mazabar Kano ta Arewa, gabanin babban zaɓen 2027.
Barau, wanda ke wakiltar Kano ta Arewa a Majalisar Dattawa, ya bayyana hakan ne a wani saƙo da ya wallafa a shafukansa na sada zumunta ranar Asabar.
Ya ce ya kwashe lokaci yana ganawa da ƙungiyoyi daban-daban a mazabar domin neman goyon bayansu da ƙuri’unsu ga ’yan takarar jam’iyyar All Progressives Congress (APC).
A cewarsa, gangamin na da nufin tattara goyon baya ga Shugaban Najeriya, Bola Ahmed Tinubu, da kansa a matsayin ɗan takarar APC na Majalisar Dattawa mai wakiltar Kano ta Arewa, da Gwamnan Kano, Abba Kabir Yusuf, da sauran ’yan takarar APC na Majalisar Dokoki ta Ƙasa da ta Jiha.
Ya ce gangamin ya kai ga ’yan APC da ’yan jam’iyyun adawa, ’yan kasuwa, manoma, malamai, masu sana’o’i, malamai masu koyarwa, masu safarar fasinjoji, matan aure, ƙungiyoyin matasa, malamai addini, ƙungiyoyin ƙwararru da ƙungiyoyin mata.
Barau ya kuma ce wasu daga cikin al’ummar ƙaramar hukumar Dambatta, ƙarƙashin jagorancin tsohon ɗan Majalisar Wakilai na wa’adi uku, Badamasi Ayuba, sun bayyana goyon bayansu ga APC yayin wata ziyara ta girmamawa.
Ya ce Ayuba ya bayyana kyakkyawan fata cewa APC za ta yi nasara a Dambatta, yana mai danganta hakan da ayyukan da Barau ya ce ya aiwatar a ƙaramar hukumar.
Ayuba ya kuma yi kira ga ’yan APC da su kasance masu haɗin kai, yana mai cewa an rufe batutuwan da suka taso sakamakon takaddamar zaɓen fidda gwani na jam’iyyar.
Dangane da kujerar Majalisar Wakilai ta Dambatta/Makoda, Ayuba ya ce sun gana da ɗan Majalisar, Hon. Chideri, inda suka ba shi shawarar ya gana da Mataimakin Shugaban Majalisar Dattawa.
