Gwamnan Jihar Kaduna, Uba Sani, ya yi hasashen cewa Shugaba Bola Ahmed Tinubu zai samu gagarumin ƙarin goyon baya a jihar Kaduna a zaɓen shugaban ƙasa na 2027.
Gwamnan ya ce Tinubu na iya samun tsakanin kashi 70 zuwa 80 cikin 100 na kuri’un Kaduna, sabanin kusan kashi 29 cikin 100 da ya samu a zaɓen 2023.
Uba Sani ya bayyana hakan ne yayin wata hira da Channels Television, inda ya musanta ikirarin cewa al’ummar Arewa na shirin juya wa Shugaba Tinubu baya a zaɓen 2027.
A cewarsa, ra’ayin cewa Arewa na adawa da Tinubu ya fi samo asali ne daga muhawarar siyasa da ake yi a kafafen sada zumunta, maimakon abin da yake faruwa a zahiri tsakanin al’umma.
Ya ce yanayin siyasar Kaduna ya sauya tun bayan zaɓen 2023, saboda haka ba daidai ba ne a yi amfani da sakamakon zaɓen baya wajen hasashen abin da zai faru a 2027.
A zaɓen 2023, Atiku Abubakar ya samu kuri’u 554,360 a Kaduna, yayin da Tinubu ya samu 399,293.
Gwamnan ya ce sauya sheƙar wasu fitattun ’yan siyasa daga jam’iyyun adawa zuwa APC, musamman a Kudancin Kaduna, na daga cikin abubuwan da zai iya sauya tsarin zaɓe a jihar.
Ya kuma danganta ƙarin goyon bayan da yake hasashen Tinubu zai samu da wasu ayyukan gwamnatin tarayya a Kaduna, ciki har da kafa Jami’ar Kimiyya da Fasaha ta Tarayya a Kudancin Kaduna da kuma wasu ayyukan kiwon lafiya.
Uba Sani ya ce duk da cewa yana girmama tsofaffin shugabannin Kaduna kamar Nasir El-Rufai, Ahmed Makarfi da Namadi Sambo, a matsayinsa na gwamna kuma ɗan APC, wajibi ne ya tsaya wajen kare muradun jam’iyyarsa.
A cewar Uba Sani, Tinubu zai iya tashi daga kusan kashi 29 cikin 100 da ya samu a 2023 zuwa tsakanin kashi 70 zuwa 80 cikin 100 a Kaduna a 2027.
