Rundunar ’Yan Sandan Jihar Kano ta sanar da kama wasu mutane uku da ake zargi da hannu wajen satar adaidaita sahu da motoci a wasu sassan jihar da maƙwabtan jihohi.
Kakakin Rundunar ’Yan Sandan Jihar Kano, CSP Abdullahi Haruna Kiyawa, ne ya bayyana hakan cikin wata sanarwa da ya fitar ranar Talata, 11 ga Agusta, 2026.
Rundunar ta ce ta kama Muhammad Sani, mai shekaru 23, bisa zargin satar adaidaita sahun wani direba a titin Hadejia.
Binciken da aka gudanar ya kai jami’an rundunar har zuwa Jihar Katsina, inda aka cafke Aminu Sa’ad, mai shekaru 33, tare da kwato adaidaita sahu guda huɗu.
A wani samame kuma, jami’an rundunar sun kama Isah Yusuf, mai shekaru 23, a Rijiyar Lemo, inda aka samu wata mota kirar Pontiac da ake zargin an sace daga Jihar Taraba.
A cewar rundunar, an kai motar zuwa Jamhuriyar Nijar kafin daga bisani aka dawo da ita Najeriya.
Rundunar ta ce an mayar da adaidaita sahu huɗun ga masu su, yayin da ake ci gaba da bincike kan waɗanda aka kama da kuma ƙoƙarin gano mai motar Pontiac domin ya gabatar da shaidar mallakarta.
