Sabon rahoto daga hukumar eSafety ta Australia ya nuna cewa fiye da kashi 80 cikin 100 na matasan da ke ƙasa da shekara 16 har yanzu suna amfani da kafafen sada zumunta, duk da dokar da gwamnatin ƙasar ta kafa watanni uku da suka gabata domin hana su amfani da irin waɗannan manhajoji.
Rahoton ya ce yawancin yara masu tsakanin shekara 10 zuwa 15 suna ci gaba da amfani da kafafen sada zumunta kusan kamar yadda suke yi kafin dokar ta fara aiki. Hukumar ta danganta hakan da gazawar kamfanonin fasaha wajen aiwatar da ingantattun hanyoyin tantance shekarun masu amfani.
Kafin fara dokar, kusan kashi 86 na yaran da aka yi bincike a kansu suna amfani da wani dandalin sada zumunta da aka kayyade shekaru. Bayan watanni uku da fara dokar, adadin ya sauka kaɗan zuwa sama da kashi 81, yayin da kusan kashi 58 suka ce har yanzu suna amfani da kafafen sada zumunta kullum.
Rahoton ya kuma nuna cewa kusan rabin yaran da suka ci gaba da amfani da asusunsu sun ce ba a taɓa tantance shekarunsu ba. Wasu kuma sun ce sun yi rajista da shekarun da suka haura 16 ko kuma tsarin tantance shekarun ya kasa gano ainihin shekarunsu.
Sai dai gwamnatin Australia ta kare dokar, tana mai cewa ba ta taɓa tsammanin za a samu cikakken bin doka ba tun daga farko. Ta ce duk da ƙalubalen, dokar ta taimaka wajen ƙara wayar da kan iyaye da kuma rufe miliyoyin asusun da ba su dace da shekarun masu amfani ba.
