Ɗan takarar shugaban ƙasa na jam’iyyar ADC, Atiku Abubakar, ya buƙaci Shugaba Bola Tinubu ya yi wa ’yan Najeriya cikakken bayani kan Naira tiriliyan 12.8 da aka ware a ƙarƙashin Service-Wide Vote (SWV) a kasafin kuɗin 2026. Ya ce tsarin ya haifar da tambayoyi kan gaskiya da riƙon amana.
Atiku ya bayyana cewa kuɗin SWV ya tashi daga Naira biliyan 638 a kasafin 2025 zuwa Naira tiriliyan 12.8 a 2026. A cewarsa, wannan ƙarin mai yawa ba zai yiwu ba tare da gwamnati ta bayyana dalilin hakan ba.
Ya kuma yi tambaya kan yadda aka ware Naira tiriliyan 2.19 domin albashin ma’aikata a ƙarƙashin SWV. Ya ce dole ne gwamnati ta bayyana su waye waɗannan ma’aikatan da kuma hukumomin da suke aiki.
Tsohon mataimakin shugaban ƙasar ya ce idan gwamnati ta kasa yin cikakken bayani, mutane za su iya zargin cewa an tanadi kuɗin ne domin ayyukan siyasa da shirye-shiryen zaɓen 2027. Ya ce gwamnati mai gaskiya ba ta kamata ta ɓoye irin wannan adadin kuɗi ba.
Atiku ya buƙaci Majalisar Dokoki ta Ƙasa ta gudanar da cikakken bincike kan dukkan kuɗaɗen da aka ware a ƙarƙashin SWV. Ya ce ya zama dole a bayyana yadda za a kashe kuɗin da kuma waɗanda za su amfana da shi.
