Wani mummunan hatsarin jirgin ruwa ya auku a ƙauyen Malamawa da ke gundumar ’Yan Dutse a ƙaramar hukumar Ringim ta jihar Jigawa, inda mutum ɗaya ya rasa ransa yayin da wasu da dama suka ɓace. Lamarin ya faru ne ranar Lahadi lokacin da wani jirgin ruwa ɗauke da kusan fasinjoji 40, mafi yawansu mata da yara, ya kife yayin da yake ƙoƙarin tsallaka wani kogi a yankin.
Rundunar ‘yan sandan jihar Jigawa ta tabbatar da faruwar lamarin ta bakin kakakinta, SP Shi’isu Lawan Adam. Ya ce zuwa yanzu an gano gawar mutum ɗaya, yayin da jami’an ceto tare da masu aikin agaji da masu sa kai ke ci gaba da laluben sauran fasinjojin da har yanzu ba a gano inda suke ba.
A cewarsa, jami’an tsaro da hukumomin agaji sun baza jami’ansu domin ci gaba da aikin ceto, tare da tabbatar da cewa za a ci gaba da bincike har sai an gano dukkan mutanen da hatsarin ya rutsa da su. Ya kuma buƙaci jama’a su kwantar da hankalinsu tare da bai wa jami’an da ke gudanar da aikin haɗin kai.
Hatsarin ya jefa al’ummar Malamawa cikin alhini, yayin da iyalai da mazauna yankin suka taru a bakin kogin cikin fargaba suna jiran sakamakon aikin ceto. Haka kuma, Majalisar Masarautar Ringim ta fitar da sanarwa inda ta tabbatar da aukuwar hatsarin, tana mai cewa an yi asarar rayuka, sai dai har yanzu ana ci gaba da tantance adadin waɗanda suka mutu da waɗanda suka tsira.
Majiyoyi daga yankin sun ce masu sa kai daga cikin al’umma sun haɗa kai da jami’an tsaro wajen aikin ceto, yayin da sarakunan gargajiya suka yi kira ga jama’a da su kasance cikin natsuwa tare da goyon bayan jami’an agaji. Har zuwa lokacin kammala wannan rahoto, hukumomi ba su fitar da cikakken adadin waɗanda suka mutu ko suka tsira ba, saboda ana ci gaba da bincike a cikin ruwa. Masana harkokin tsaro a ruwa sun sake jaddada muhimmancin amfani da rigunan kariya, duba lafiyar jiragen ruwa akai-akai da kuma kauce wa ɗaukar fasinjoji fiye da ƙa’ida domin rage yawaitar irin waɗannan hatsarori.
