Wata babbar kotu a Kenya ta gurfanar da ɗalibai mata takwas bisa zargin hannu a gobarar da ta tashi a ɗakin kwanan dalibai, wadda ta yi sanadin mutuwar ɗalibai 16 tare da jikkata wasu 79.
Lamarin ya faru ne a ƙarshen watan Mayu a makarantar Utumishi Girls’ Academy Senior School da ke garin Gilgil, a gundumar Nakuru.
Yawancin ɗaliban makarantar na tsakanin shekaru 15 zuwa 18 ne.
Waɗanda ake tuhuma sun bayyana a gaban Alkaliya Diana Kavedza a Babbar Kotun Kibera da ke Nairobi, inda suka musanta dukkan zarge-zargen da ake yi musu.
Har yanzu dai masu gabatar da ƙara ba su bayyana ƙarin bayanai kan shari’ar ba.
