Rundunar ‘Yan Sandan Najeriya ta tabbatar da cewa tana ci gaba da ƙoƙarin ceto ɗalibai da malamai da aka sace a Ƙaramar Hukumar Oriire ta Jihar Oyo, tare da sanar da shirin ɗaukar ƙarin jami’ai 40,000 domin ƙarfafa tsaro a faɗin ƙasar.
Rahotanni sun ce wasu ‘yan bindiga sun sace ɗalibai 39 da malamai bakwai a watan Yunin 2026, bayan kai hari kan wasu makarantu a jihar.
Mataimakin Sufeto Janar na ‘Yan Sanda mai kula da shiyyar Kudu maso Yamma da ICT, DIG Adegoke Fayoade, ya bayyana hakan ne yayin wata ziyara da ya kai Hedikwatar Rundunar ‘Yan Sandan Jihar Legas.
Ya ce hukumomin tsaro na aiki tare domin tabbatar da an ceto waɗanda aka sace cikin ƙanƙanin lokaci, yana mai jaddada cewa lafiyarsu ita ce babbar manufa.
Fayoade ya kuma bayyana cewa shirin ɗaukar sabbin jami’an ‘yan sanda 40,000 wani mataki ne na ƙara yawan jami’ai da inganta ƙarfin rundunar wajen tunkarar matsalolin tsaro a ƙasar.
Haka kuma, ya musanta zargin cewa ayyukan binciken ‘yan sanda a Legas sun raunana tun bayan zanga-zangar EndSARS, yana mai cewa nasarorin da rundunar ke samu na baya-bayan nan sun nuna ƙarfin tsarin aikinta.
