An ɗage zaman tattaunawar da aka shirya tsakanin Amurka da Iran a ƙasar Switzerland kan aiwatar da yarjejeniyar tsagaita wuta, bayan sabbin hare-haren da Isra’ila ta kai a kudancin Lebanon.
Ma’aikatar Harkokin Wajen Switzerland ta tabbatar da cewa an jinkirta taron da aka shirya gudanarwa a ranar Juma’a a Burgenstock, bayan Iran ta dakatar da aika tawagarta saboda hare-haren.
Rahotanni sun ce hare-haren Isra’ila da aka kai cikin daren Alhamis sun yi sanadin mutuwar aƙalla mutane 16 a kudancin Lebanon, yayin da ƙungiyar Hezbollah ta ce an gwabza kazamin faɗa a yankin.
A nasa bangaren, Firaministan Isra’ila, Benjamin Netanyahu, ya bayyana cewa sojojin ƙasarsa za su ci gaba da kasancewa a yankin tsaro na kudancin Lebanon, yana mai nuna adawa da wasu sassa na yarjejeniyar tsagaita wutar da Amurka da Iran suka cimma, musamman waɗanda suka shafi Lebanon.
