Kungiyar kare hakkin jama’a ta SERAP ta kai karar Kamfanin Mai na Najeriya NNPCL kotu domin neman karin haske kan yadda aka kashe kusan Naira biliyan 5.9 wajen sauya tsohon sunan NNPC zuwa NNPCL.
Kungiyar ta bukaci kotu ta umarci kamfanin da ya fitar da cikakken bayani kan yadda aka kashe kudaden, sunayen kamfanonin da suka gudanar da aikin sauya sunan, da kuma jami’an da suka amince da kashe kudin.
SERAP ta kuma nemi a bayyana ko an bi dokoki da ka’idojin gwamnati wajen bayar da kwangilolin da suka shafi aikin.
A cewarta, jama’a na da hakkin sanin yadda ake amfani da kudaden gwamnati.
Kungiyar ta kara da cewa a baya Majalisar Dattawa ta nuna damuwa kan wannan kashe kudi, amma har yanzu ba a sanya ranar fara sauraron karar ba.
