Mutane 49 sun rasa rayukansu sakamakon tsananin kishirwa a hamadar Nijar bayan motar da suke tafiya da ita ta lalace a tsakiyar sahara.
Rahotanni sun bayyana cewa mutanen na kan hanyarsu ne ta ketare hamadar lokacin da motarsu ta samu matsala, lamarin da ya sa suka makale a wani yanki mai nisa ba tare da samun ruwa ko taimako ba.
An ce fasinjojin sun kwashe kwanaki suna fama da matsanancin zafi da rashin ruwa kafin jami’an ceto su isa wurin.
Sai dai zuwa lokacin, mutane 49 tuni sun mutu yayin da aka samu nasarar ceto wasu kaɗan daga cikin waɗanda suka tsira.
Mahukunta a Nijar sun bayyana alhininsu kan wannan mummunan lamari tare da jaddada haɗarin da ke tattare da zirga-zirga a hamadar sahara, musamman ga matafiya da ke amfani da hanyoyin da ba su da ingantattun kayan kariya da tanadin ruwa.
Ana ci gaba da bincike domin gano cikakkun bayanai kan lamarin da kuma ɗaukar matakan da za su rage aukuwar irin wannan ibtila’i a nan gaba.
