Rundunar Sojin Najeriya ta karyata zargin da ake mata na hallaka fararen-hula a wasu yankuna na jihar Neja, inda ta ce rahotannin da ke yawo a kafafen sada zumunta ba su da tushe kuma an yi su ne ba tare da ingantaccen bincike ba.
A cikin wata sanarwa da rundunar ta fitar, ta bayyana cewa dakarunta na gudanar da ayyukan tsaro ne cikin bin doka da ka’ida, tare da kare rayukan fararen-hula a duk inda suke gudanar da aiki.
Rundunar ta ce ana yawan yada labaran karya da ke nufin bata sunan sojoji da kuma tayar da hankalin jama’a, musamman a yankunan da ke fama da matsalolin tsaro.
Ta kuma jaddada cewa tana aiki kafada da kafada da hukumomin cikin gida da na jiha domin tabbatar da zaman lafiya a jihar Neja da kewaye.
A gefe guda, rundunar ta bukaci jama’a da su rika tabbatar da sahihancin labarai kafin yadawa, tare da dogaro da bayanan hukumomin da suka dace.
Jihar Neja dai na daga cikin jihohin da ke fuskantar kalubalen tsaro, inda ake ci gaba da gudanar da ayyukan soji domin fatattakar ‘yan bindiga da sauran masu tayar da hankali.
