Sanatan da ke wakiltar Yobe ta Gabas, Mustapha Musa Kulas, ya janye daga takarar zaɓen 2027, inda ya bayyana goyon bayansa ga gwamnan jihar, Mai Mala Buni, a matsayin wanda yake so ya gaje shi a Majalisar Ƙasa.
Sanatan ya sanar da janyewar tasa ne a cikin wata sanarwa, yana mai cewa ya amince da shawarar shugabannin jam’iyya da tsarin siyasar da aka tsara domin zaɓen 2027.
Ya ce: “Na janye daga takarar neman tikitin jam’iyya a hukumance,” yana mai jaddada cewa ba zai nemi wata kujera ta zaɓe ba.
Haka kuma, ya umarci magoya bayansa da su daina yaɗa duk wani kayan yaƙin neman zaɓe da ke tallata shi ga kowace kujera.
Sanata Mustapha ya kuma taya tsohon Sakataren Gwamnatin Jihar, Baba Mallam Wali, murnar fitowarsa a matsayin wanda shugabannin jam’iyya suka fi so ya tsaya takarar gwamna.
Ya yi wa Wali da dukkan ‘yan takarar jam’iyyar APC fatan alheri a zaɓen da ke tafe.
Sanatan, wanda a baya yake neman tikitin gwamna, ya nuna godiya matuƙa ga gwamna Buni da kuma Sanata Ibrahim Geidam, Ministan Harkokin ‘Yan Sanda, bisa irin goyon baya da jagoranci da suka ba shi, wanda ya taimaka masa tun daga matakin farko na siyasa har ya kai ga zama sanata.
Rahotanni sun nuna cewa Sanata Mustapha sirikin Geidam ne, domin ministan yana auren ‘yarsa ta jini.
Haka kuma, Gwamna Buni ma sirikin Geidam ne, inda ya auri ‘yarsa bayan rantsar da shi a matsayin gwamna a shekarar 2019.
Wasu magoya bayan siyasa sun bayyana cewa wannan ci gaba a siyasar Yobe na nuna ƙoƙari na haɗin kai da jituwa a cikin jam’iyyar APC, yayin da take ƙara shiri domin zaɓen 2027.
