Kwamandan Bataliya ta 242 da ke Monguno, Col. I.A. Mohammed, tare da akalla sojoji 10 sun rasa rayukansu sakamakon fashewar bam da ake zargin ‘yan ta’adda ne suka dasa a ƙaramar hukumar Monguno ta Jihar Borno.
Majiyoyi daga yankin sun ce Col. Mohammed ya rasu ne yayin da yake kan hanyarsa ta kai ɗauki bayan wani hari da aka kai wa sansanin sojoji da daddare.
An ce lamarin ya faru ne lokacin da jami’in ya amsa kiran gaggawa daga sojojin da ke ƙarƙashinsa da aka kai wa hari a wani sansanin Forward Operating Base da ke da alaƙa da Bataliya ta 242.
A cewar majiyoyin, motarsa ta taka bam ɗin ne yayin da yake gaggawar zuwa taimakawa bayan ‘yan ta’adda sun kai hari mai tsanani a daren Lahadi.
Rahotanni sun nuna cewa wannan lamari ya faru ne kwanaki uku kacal bayan wani hari makamancin haka da ya yi sanadin mutuwar wani kwamandan runduna, Brig. Gen. Oseini Braimah, tare da akalla sojoji 17 a Benisheikh, ƙaramar hukumar Kaga ta Jihar Borno.
Jami’in yaɗa labarai na rundunar haɗin gwiwa ta Operation HADIN KAI, Lt. Col. Sani Uba, ya tabbatar da harin, yana cewa lamarin ya faru ne a daren ranar 12 ga Afrilu lokacin da sojojin Sector ta 3 suka fuskanci harin ‘yan ta’adda a Monguno.
Ya ce bayan musayar wuta mai tsanani, sojojin sun yi nasarar tarwatsa ‘yan ta’addan tare da ci gaba da rike yankin.
“Abin takaici, yayin da kwamandan ke kan hanyarsa ta zuwa wajen domin duba halin da ake ciki da kansa, sai ya gamu da bam ɗin wanda ya lalata motarsa, ya yi sanadin mutuwarsa tare da wasu sojoji shida,” in ji shi.
Ya ƙara da cewa matakin da kwamandan ya ɗauka na zuwa gaban yaƙi duk da haɗari ya nuna jarumtaka, sadaukarwa, da jagoranci na gaskiya.
Rundunar Operation HADIN KAI ta bayyana alhini kan rasuwar jami’in tare da sauran sojojin, tana mai cewa sadaukarwar su ba za ta taɓa gushewa a zukatan rundunar da ƙasar da suka yi wa hidima ba.
