Hukumar INEC ta dakatar da duk wani shiri da ya shafi aikin sake tantance masu kada kuri’a a fadin Najeriya.
Hukumar ta umarci dukkan Kwamishinonin Zabe na jihohi da su dakatar da duk wani shiri, tallace-tallace ko shirye-shiryen da suka shafi aikin, tare da jiran sabon umarni daga hedikwata.
Sai dai INEC ta bayyana cewa duk da dakatarwar, ya zama dole a ci gaba da wasu shirye-shiryen cikin gida kamar horar da ma’aikata, tanadin kayan aiki da kuma tsara yadda aikin zai gudana a gaba.
Tun da farko, an shirya fara wannan aikin ne domin sabunta rajistar masu kada kuri’a, cire wadanda ba su cancanta ba, da kuma tabbatar da ingancin bayanan masu kada kuri’a gabanin zaben shekarar 2027.
Dakatarwar ta biyo bayan damuwar da wasu masu ruwa da tsaki suka nuna kan lokacin da aka zaba da kuma yadda za a gudanar da aikin, suna masu cewa hakan na iya janyo rudani ko rashin fahimta ga jama’a.
INEC ta tabbatar wa ‘yan Najeriya cewa za ta sake sanar da sabon lokaci da tsarin da za a bi, tare da jaddada kudirinta na gudanar da sahihin zabe mai gaskiya da inganci a kasar.
