Mataimakin gwamnan Jihar Kano, Aminu Abdussalam Gwarzo, ya yi murabus daga mukaminsa, kamar yadda sanarwa daga ƙungiyar Kwankwasiyya ta tabbatar.
A cewar kakakin ƙungiyar, Dr. Habibu Sale Mohammed, an ɗauki wannan mataki ne duk da wahalarsa domin amfanin al’umma da kuma tabbatar da daidaiton shugabanci a jihar Kano.
Sanarwar ta bayyana cewa wasu yanayi na baya-bayan nan sun hana mataimakin gwamnan gudanar da ayyukansa yadda ya kamata, don haka ya zama dole a bar ofishin ya ci gaba da aiki yadda ya dace domin amfanin jama’a.
Haka kuma, an jaddada cewa murabus ɗin ba yana nufin amincewa da zarge-zargen da Majalisar Dokokin Kano ta yi masa ba ne, domin har yanzu yana kan matsayinsa na rashin aikata laifi.
Ya bayyana cewa zai mayar da hankali wajen ƙarfafa ƙungiyar Kwankwasiyya da shirye-shiryenta, musamman gabanin zaɓen 2027, tare da kira ga magoya baya da al’ummar Kano su kasance masu bin doka da goyon bayan dimokuraɗiyya.
