Majalisar wakilai ta ƙara ɗaukar matakai domin sake fasalin tsarin dokokin zaɓe a Najeriya, bayan amincewa da jerin gyare-gyare a kudirin gyaran dokar zaɓe.
Gyare-gyaren da aka amince da su sun mayar da hankali ne kan ƙarfafa ikon hukumar INEC, fayyace hanyoyin gudanar da zaɓe, da sauransu.
An yanke shawarar sauya wasu sassa da suka shafi shari’o’in kafin zaɓe, cancantar ’yan takara da kuma hukunci kan yin maguɗin zaɓe.
Muhawara dai ta yi zafi kan batun hana ’yan takara da jam’iyyunsu rike tutar jam’iyya idan an kama su da bayar da bayanan ƙarya a Najeriya.
