Mai shari’a Inyang Ekwo na Babbar Kotun Tarayya da ke Abuja ya gargadi lauyoyin da ke cikin shari’ar da tsohon Mataimakin Shugaban Ƙasa, Atiku Abubakar, ya shigar kan Shugaba Bola Ahmed Tinubu, da su guji tattauna batun shari’ar a kafafen sada zumunta ko kafafen watsa labarai.
Atiku Abubakar da jam’iyyar ADC na kalubalantar cancantar Shugaba Bola Ahmed Tinubu na sake neman takarar shugaban ƙasa a zaɓen 2027, inda ake danganta ƙarar da zargin takardar shaidar kammala aikin bautar ƙasa ta NYSC da aka miƙa wa INEC.
Yayin zaman kotun da aka gudanar ranar Talata, Mai shari’a Inyang Ekwo ya bayyana cewa kotu ce kaɗai wurin da ya dace a gudanar da shari’ar, ba Facebook, X (Twitter) ko kafafen watsa labarai ba.
Alkalin ya yi gargaɗin cewa duk wani lauya da ya ci gaba da yin tsokaci kan shari’ar mai lamba FHC/ABJ/CS/1888/2026 a kafafen sada zumunta zai iya fuskantar matakin ladabtarwa daga kotu.
Ya ce kotun ba za ta amince da amfani da kafafen sada zumunta wajen tattauna batun da ke gabanta ba, yana mai jaddada cewa ya kamata dukkan bangarorin su gabatar da hujjojinsu a gaban kotu.
A yayin zaman, lauyan Atiku Abubakar, Joseph Onu, ya shaida wa kotun cewa ba su samu damar isar da takardun shari’ar ga Shugaba Tinubu ba.
Lauyan ya nemi a tabbatar da cewa shugaban ƙasa ya samu cikakken bayani game da ƙarar, domin kauce wa wata matsala ta shari’a nan gaba.
A bangaren Shugaba Tinubu kuwa, Omosanya Popoola ne ya wakilce shi, yayin da Alex Iziyon ya kasance lauyan Hukumar Zaɓe Mai Zaman Kanta ta Ƙasa (INEC).
Bayan sauraron batutuwan da aka gabatar, Mai shari’a Inyang Ekwo ya ɗage ci gaba da sauraron ƙarar zuwa 28 ga Satumba, 2026.
Shari’ar na cikin jerin ƙorafe-ƙorafen da ake gabatarwa gabanin zaɓen shugaban ƙasa na 2027, inda ake ƙalubalantar cancantar wasu ‘yan takara.
A halin yanzu, babu hukuncin ƙarshe da kotu ta yanke kan wannan ƙara, kuma dukkan bangarorin da abin ya shafa za su samu damar gabatar da hujjojinsu gaban kotu.
