Tsagin jam’iyyar ADC karkashin jagorancin Nafiu Bala Gombe ya yi wa tsohon Mataimakin Shugaban Ƙasa, Atiku Abubakar, gargadin ya daina bayyana kansa a matsayin ɗan takarar shugaban ƙasa na jam’iyyar a zaɓen 2027.
Tsagin ya ce Atiku ba shi ne ɗan takararsa ba, inda ya bayyana Farfesa Chris Uba a matsayin ɗan takarar shugaban ƙasa da ya samu tikitin jam’iyyar.
Nafiu Bala Gombe ya bayyana hakan ne yayin wata hira, inda ya ce tsagin nasa ya kammala tsarin zaɓen ɗan takara bisa kundin tsarin jam’iyyar da tanade-tanaden dokar zaɓe.
Ya kuma yi watsi da ɓangaren da ke ƙarƙashin jagorancin tsohon Shugaban Majalisar Dattawa, David Mark, yana mai cewa tsagin nasa ne ya bi tsarin da ya dace wajen fitar da ɗan takarar shugaban ƙasa.
Sai dai rikicin cikin gida na ADC ya raba jam’iyyar zuwa ɓangarori biyu, musamman kan batun shugabanci da ɗan takarar shugaban ƙasa na 2027.
A gefe guda, ɓangaren da ke ƙarƙashin David Mark ya gabatar da Atiku Abubakar a matsayin ɗan takarar shugaban ƙasa na ADC.
Rahotanni sun nuna cewa Hukumar Zaɓe Mai Zaman Kanta ta Ƙasa (INEC) ta amince da ɓangaren David Mark, kuma a halin yanzu shafin INEC na jam’iyyun siyasa yana nuna David Mark a matsayin Shugaban Ƙasa na ADC.
Hakan na nufin har yanzu ana fuskantar takaddama kan wane ɓangare ne ke da ikon wakiltar ADC da kuma wanda zai kasance ɗan takarar jam’iyyar a zaɓen shugaban ƙasa na 2027.
Tsagin Nafiu Bala ya ci gaba da cewa zai kare matsayinsa ta hanyoyin doka da kundin tsarin jam’iyyar, yayin da ɓangaren David Mark ke ci gaba da samun matsayi daga hukumomin zaɓe.
A halin yanzu, batun na ci gaba da kasancewa cikin muhimman rikice-rikicen siyasar ADC gabanin zaɓen 2027.
INEC dai ta sanya zaɓen shugaban ƙasa da na Majalisar Dokoki ta Ƙasa a ranar 16 ga Janairu, 2027.
