Gwamnan Jihar Osun, Ademola Adeleke, na kan gaba da ɗan takarar jam’iyyar APC, Bola Oyebamiji, da tazarar kuri’u 64,148, bayan an tattara sakamakon zaɓen gwamna daga ƙananan hukumomi 14.
Bayanan da aka tattara daga cibiyoyin tattara sakamakon INEC sun nuna cewa Adeleke, wanda ke takara a ƙarƙashin jam’iyyar Accord, ya samu kuri’u 268,957, yayin da Oyebamiji ya samu 204,809.
Adeleke ya yi nasara a ƙananan hukumomi tara, yayin da APC ta samu nasara a biyar.
Daga cikin wuraren da Adeleke ya yi ƙarfi akwai Ede North, inda ya samu kuri’u 35,427, yayin da APC ta samu 10,283. A Osogbo kuma ya samu 36,480, yayin da APC ta samu 30,474.
A Ede South, Adeleke ya samu kuri’u 26,188 kan 6,219 na APC, sannan ya lashe Iwo da kuri’u 27,085, yayin da APC ta samu 19,660.
Sai dai APC ta samu nasara a wasu ƙananan hukumomi, ciki har da Irepodun, inda ta samu 15,713 kan 14,502 na Adeleke, da Obokun inda ta samu 16,120 kan 12,023.
APC ta kuma lashe Ola-Oluwa, Atakunmosa East da Ife South.
Sai dai sakamakon ƙananan hukumomi 14 ne kawai aka samu cikin 30 na jihar, don haka har yanzu ba za a iya ayyana wanda ya lashe zaɓen ba.
Ana ci gaba da tattara sauran sakamakon kafin INEC ta sanar da wanda ya lashe zaɓen a hukumance.
