Sabon tsarin albashin da Shugaba Bola Ahmed Tinubu ya amince da shi zai sa albashin Private ya tashi zuwa N187,200, yayin da Janar zai karɓi N3.25m a wata. Tsarin zai fara aiki daga 1 ga Satumba 2026, kuma zai amfani kusan sojoji 250,000.
Sojojin da ke sama da Colonel za su samu ƙarin 30%, Colonel zuwa Warrant Officer 50%, yayin da Private zuwa Staff Sergeant za su samu 80%. Hakan zai ƙara kuɗin albashin sojojin shekara-shekara daga N660bn zuwa N924bn.
Sabon tsarin zai sa Lance Corporal ya karɓi N201,600, Corporal N207,000, Sergeant N225,000, Staff Sergeant N270,000, yayin da Brigadier-General zai karɓi N975,000. Major-General zai karɓi N1.495m, Lieutenant-General N2.47m, sannan General N3.25m.
Tinubu ya ce ƙarin albashin na da nufin nuna godiya ga sojojin da ke sadaukar da rayukansu wajen yaƙi da ’yan bindiga, masu garkuwa da mutane da ’yan ta’adda. Sai dai ƙungiyoyin fararen hula sun ce hauhawar farashi na iya rage tasirin ƙarin albashin.
Wasu sojoji sun ce suna maraba da ƙarin albashin, amma suna buƙatar gwamnati ta ƙara ɗaukar matakai kan tsadar rayuwa, gidaje, lafiya da ilimin ’ya’yansu. Sun ce abin da ya fi muhimmanci shi ne ƙimar kuɗin da suke samu da yadda zai inganta rayuwarsu.
