Najeriya ta karɓi shugabancin Ƙungiyar Sadarwa ta Afirka (ATU), lamarin da ya ƙara tabbatar da rawar da ƙasar ke takawa wajen jagorantar harkokin sadarwa da fasahar zamani a nahiyar.
An bayyana hakan ne bayan kammala taron ƙungiyar karo na bakwai, inda wakilan Najeriya suka halarta ƙarƙashin jagorancin Ministan Sadarwa, Ƙirƙire-ƙirƙire da Tattalin Arziƙin Zamani, Dr. Bosun Tijani.
A yayin taron, Najeriya ta kuma amince da Yarjejeniyar Abuja, wadda ke da nufin ƙarfafa haɗin gwiwar ƙasashen Afirka wajen bunƙasa harkokin sadarwa da fasahar zamani.
Ƙungiyar Sadarwa ta Afirka na taka muhimmiyar rawa wajen haɓaka haɗin gwiwa tsakanin ƙasashen nahiyar a fannin sadarwa, fasahar zamani da tattalin arziƙin zamani.
Karɓar shugabancin ƙungiyar na ba Najeriya damar taka muhimmiyar rawa wajen tsara manufofi da jagorantar shirye-shiryen da za su taimaka wajen ci gaban harkokin sadarwa a Afirka.
