Wani bidiyo da ya karade kafafen sada zumunta na wani mazaunin Jihar Plateau mai suna John Arum yayin da masu garkuwa da mutane ke azabtar da shi ya jawo cece kuce gami da fusata jama’a.
An bayyana cewa Arum dalibi ne wanda ya kammala karatu daga University of Jos, kuma yana shirin shiga aikin yiwa ƙasa hidima.
A cewar abokansa, an sace shi ne a hanyar Jos zuwa Kaduna, inda masu garkuwa da shi ke neman kuɗin fansa har Naira miliyan 30.
A cikin bidiyon da ya yadu, an ga Arum yana kwance a ƙasa yana fuskantar ƙasa, an ɗora masa dutse a baya yayin da wasu mutane biyu ke dukansa.
Majiyoyi sun ce an ɗauki bidiyon ne da wayar wanda aka sace, sannan aka tura shi a WhatsApp domin matsa wa iyalansa da abokansa su biya kuɗin fansa.
Mai gidansa, Mista Jethro Akau, ya tabbatar da faruwar lamarin, inda ya bayyana shi a matsayin matashi mai ƙwazo da ladabi wanda ya kammala karatunsa kwanan nan kuma yana jiran kiran NYSC.
Ya ce Arum yana aiki ne a matsayin ƙwararren mai gyaran kayan kiɗa, inda yake gyarawa da kuma saita kayan. Ya bayyana cewa Arum ya tafi Kaduna ne domin aikin gyara wasu kayan kiɗa bayan an gayyace shi.
“Bayan haka na kira shi amma wayarsa a kashe take. Daga baya ɗan uwansa ya sanar da ni cewa an sace shi,” in ji shi.
Akau ya nuna baƙin ciki matuƙa kan lamarin, yana mai cewa abin ya girgiza shi, domin ba kawai ma’aikaci ba ne, har ma amintaccen mutum ne a gare shi.
Ya roƙi masu garkuwa da shi da su tausaya masa, yana mai cewa matashi ne mai kyakkyawar makoma wanda bai cancanci irin wannan azaba ba.
Ya ƙara da cewa dukkan su suna cikin damuwa tare da addu’ar ganin an sako shi lafiya.
