Jam’iyyar ADC ta musanta rahotannin da ake yadawa cewa Shugabanta na ƙasa Sanata David Mark, ya yi murabus daga mukaminsa.
A wata sanarwa da Ofishin yada labarai na jam’iyyar na ƙasa ya fitar, an bayyana cewa jita-jitar ba gaskiya ba ce, kuma wasu mutane marasa hankali ne suka shirya ta don haifar da rudani a jam’iyyar.
Sanarwar ta tabbatar da cewa Mark har yanzu shine sahihin shugaban ADC, sannan babu wani tunani ko shirin yin murabus daga gare shi ko daga shugabannin jam’iyyar.
Jam’iyyar ta jaddada cewa shugabancinta na nan, kuma a shirye take wajen ƙarfafa dimokuradiyya da samar da shugabanci nagari ga ‘yan Najeriya.
Haka kuma, ADC ta gargadi cewa duk wani yunkuri na kawo rashin daidaito ko ruguza jam’iyyar yana fitowa ne, bisa tsoron tasirin jam’iyyar a siyasar ƙasa, musamman kafin zaɓen shekarar 2027.
Sanarwar ta ƙara cewa ƙungiyar da shugabanninta za su ci gaba da dagewa wajen kare dimokuradiyyar jam’iyyu a Najeriya.
A ƙarshe, ADC ta yi kira ga ‘yan Najeriya da su yi watsi da waɗannan jita-jita, tare da tabbatar da tabbacin shugabanci da kwanciyar hankali na jam’iyyar.
