Dan wasan tsakiya ɗan Najeriya, Quadri Liameed, ya suma bayan Jose Corpas na Albacete ya buge shi a kai yayin wasan rukuni na biyu a Sifaniya ranar Asabar.
Lamarin ya faru ne lokacin da Corpas ke ƙoƙarin bugun ƙwallo a sama, inda ya bugi Liameed wanda ya faɗi ƙasa a sume, aka garzaya da shi asibiti.
Ƙungiyar Sabadell ta sanar da cewa Liameed mai shekaru 24 ya farfaɗo a asibiti, kuma bayan gwaje-gwaje ba a gano wata matsalar lafiya ba. An sallame shi, kuma zai koma tare da ƙungiyarsa.
Sabadell ta sha kashi da ci 2-1 a hannun Albacete a wasan. Ƙungiyar ta kuma gode wa jami’an lafiya na Albacete bisa taimakon da suka bayar.
Liameed ya buga dukkan wasannin lig 12 na Sabadell a wannan kakar, inda ya taimaka aka zura ƙwallaye uku. A halin yanzu, ƙungiyar na tazarar maki tara daga saman teburin gasar neman gurbin zuwa La Liga.
