Shugaban EFCC, Ola Olukoyede, ya ce babban faston cocin RCCG, Pastor Enoch Adeboye, ya bayar da umarnin mayar da biliyoyin nairori da wani mamba ya bayar domin aikin cocin, bayan bincike ya gano cewa kuɗin sun fito ne daga laifukan kuɗi.
Olukoyede ya bayyana hakan ne yayin wani taro da ya yi da ma’aikatan cocin a ranar Asabar, 7 ga Nuwamba, 2026, gabanin babban taron shekara-shekara na Holy Ghost Congress.
Ya ce wani ɗan cocin ne ya bayar da kuɗaɗen domin tallafa wa aikin cocin, amma daga baya binciken EFCC ya gano asalin kuɗin. Ya kuma yaba wa Adeboye bisa umarnin mayar da su bayan sanar da shi sakamakon binciken.
Shugaban EFCC, wanda shi ma fasto ne, ya nuna damuwarsa kan ƙarin yawan shugabannin addini da ake zargi da hannu a laifukan kuɗi, tare da gargaɗin ma’aikatan coci da su guji karɓar gudummawar da ba a tabbatar da halaccin asalinta ba.
Ya kuma tuna da wata coci da ake zargi da hannu a damfarar Ponzi, inda ya ce shugabanta ya mayar da makudan kuɗi bayan EFCC ta yi barazanar ɗaukar matakin shari’a.
Olukoyede ya jaddada cewa hukumar ba za ta yi wa duk wanda aka samu da laifin almundahana sassauci ba, ba tare da la’akari da addininsa ko matsayinsa ba.
A nasa ɓangaren, Adeboye ya ce RCCG ba za ta kare duk wanda aka samu da hannu a aikata ba daidai ba ta fuskar kuɗi ba.
